صباح الخير والهوا المفعم بريحة دخان السيارات وصوت الزمامير اللي بيصرع دب، مو بس بني آدم

انا من اليوم قررت صير صديقة للبيئة، كيف يعني، يعني دير بالي بكتير شغلات، مثلا لما روح اشتري علبة لبن من الدكان، مو ضروري آخد كيس، طالما بقدر احمل الغراض بإيدي، فما في داعي للكيس، او مثلا حاول ما اطبع كتير ورق، اقرأ من الكمبيوتر واحفظ كل المعلومات بملفات على الكمبيوتر بدل ما اطبعها على ورق، اما الورق ياللي انطبع وصار بدو كب، ممكن نتصل مع جمعية اصدقاء البيئة (ممكن تتصلوا بلمى على رقم 5514430) وبيجوا لعنا عالمكتب بياخدوا الكميات الموجودة لحتى يعيدوا تدويرها

اي شي ولو مهما كان صغير، ممكن انو يساعد البيئة، وبالتالي بنخفف من ارتفاع درجات الحرارة على سطح الارض وبيقلل من ذوبان القطبين وبالتالي الفيضانات اللي بتصير ومن الامراض اللي بتنتشر نتيجة الفيضانات

كل واحد فينا ممكن يساعد البيئة بطريقته وحسب امكانياته، المهم انو نبدا ويكون عنا النية، البيئة بحاجتنا متل ما نحنا ما رح نقدر نعيش إلا حسب هي البيئة

بتمنى نحمل مسؤولية اكبر تجاه بيئتنا ونساعد بعض وكل واحد يبدا بحاله

ممكن نحط هاد التوقيع بنهاية ايميلاتنا كبداية

P  Please consider your environmental responsibility before printing this e-mail

دمتم بخير بالاخضر