يمكن من شي عشر سنين او اكتر ونحنا عم نتعلم بالمدارس وبالجامعات طريقة “توثيق نص” وبتلاقي كل مرة بينطلب فيها منا شي تقرير بننسخ شي شغلة من شي كتاب او موقع وبنقدمه بإسمنا!!!!! ما في مجال ابدا انو نتحسن ونبطل هالعادة السيئة

بجامعتي اخدت مادة كاملة عن التوثيق، ومع كل تقرير بنقدمه للجامعة لازم نوقع ورقة تعهد انو التقرير من كتابتنا وموثق بالشكل الصحيح، ولكن! لهلأ انا بكتب شي صفحة ونص من التقرير وباقي ال 8 صفحات او 9 صفحات بيكونوا منسوخين من النت :) بعرف كتير عيب بس مثلا بوثق شي اربع نصوص والباقي بمرقو هون وهون، وطبعا الدافع اني جيب علامة منيحة ولأنو وقتي بيكون ديّق كتير

اليوم فتحت على مدونة احد المدونين وفرطت على حالي من الضحك، ابداع هاد الشخص خلّى “صحفي” يقتبس كتابته وينشرها ولكن بدون توثيق! والمضحك انو هالزميل قرر يكتب ما يلي: بتسلّم عليك أمي وبتحكيلك إذا حابب تنسخ شي مكتوب هون، يا ريت تتكرم وتتركلي خبر :) ظريف مو؟

المهم، بتخيل مع الانفتاح الكبير ياللي صاير لازم نجبر حالنا على التوثيق، لأنو اقتباس اي نص بدون توثيق معناه سرقة ادبية وهاد شي بيعاقب عليه القانون، ومجرد انك تحط حالك بمكان الشخص اللي اقتبست كتابتو، رح تحس أديش صعبة انو حدا ياخد شغلك وتعبك وينشرو تحت اسمو الشخصي على البارد المستريح