عدنا والعود أحمد J بعد ظروفي الصحية المأساوية بالعشر ايام اللي مضوا، المهم مضت القصة على خير، واكتشفت انو في لجنة متخصصة بالاخطاء الطبية ، بيقدر الواحد يتصل فيهن وبيعطوه كل النصائح والدعم النفسي اللي بيحتاجو “ضحية” الخطأ الطبي!! رح اكتب عن هالموضوع بالوقت المناسب

 هلأ بدي احكي عن الحرية الشخصية، بدي فش خلقي

 انا انسانة مسلمة ومحجبة، وبنفس الوقت منفتحة على الحضارات والثقافات التانية. بديت كلامي ب “انا انسانة” يعني قبل اي شي انا بني آدم، عندي مشاعر وافكار متل كل العالم، بعمل الصح وبعمل الغلط، بس ضمن اطار المعقول. يمكن اكترنا بيتقيد بالعادات والتقاليد اكتر من الدين، مع انو كتير من العادات غلط وبيتنافى مع المنطق. ما رح ناقش الصح والغلط، لأنو كل شي إلو مقياس ونسبة

ما بعرف ليش صايرة عم حس بالتمييز بين المسلمين والمسيحيين مؤخرا، بس اللي بعرفوا انو طول حياتي جيراننا كانوا الكنيسة والقسيس ياللي عايش فيها مع عيلته، كانوا اقرب الناس إلنا، وبحياتي ما حسيت انو في فرق بيننا، حتى أعز صديقاتي مسيحية، وهي اللي وقفت معي وقت تحجبت، بكل بساطة لأنو ديني بيطلب مني الحجاب. الحجاب مالو شي بيمنعنا عن الحياة او التفكير او التطور، انا بالنسبة إلي  رقم واحد انو الحجاب احد اساسات الدين الاسلامي، وتاني شي وبرجع بقول هي وجهة نظر شخصية، انو الحجاب طريقة لصون حالي من نظرات اللي بيسوى واللي ما بيسوى، والحجاب برأيي مالو شقفة قماشة صغيرة بتنحط عالراس وبعدها بننسى انو لسا في رقبة بدها تتغطى وفي كتير اشياء لازم تتغطى، يعني هاد الديق والقصير والملون والقصص مالها حجاب!!! وبتقللك منيح مني ياللي حاطة حجاب، لأ ستي ما حزرتي، بلاه احسن، خانقة حالك في عالفاضي، وكل ما يشوفك حدا رح يقول هاد هو الحجاب؟ وشو هالتخلف؟ ورح ينحكى على ديننا اكتر واكتر، قلك شو، اسطفلي، ما دخلني، الله اللي بيحاسب انا بس بنصحك لأني بخاف عليكي وعلى ديني. انا مالي بالعادة دافع عن شي بالهجوم على شي تاني، بس يا اخي اتركونا على حريتنا، ننمحق، متل ما الراهبات بيلبسوا حجاب وتوب طويل ومستر (ما يبلوا ان شا الله، والله انا بيتاخد عقلي فيهن)، خلينا نحنا نسطفل ونلبس اللي بدنا ياه

 والله تعبت من هالعالم اللي بتضلها تنتقد، على قولة المحجبات يا لطيف شو مخبيين تحت هالحجاب، اكيد اهلها غصبوها عالحجاب، هي اللي لابسة حجاب روح الحقها شوف شو بتعمل… لك اخي انت شو دخلك؟ عم بتأثر على حياتك شخصيا؟ واقفة بحلقك شي؟ تنمحق، بكرا ربنا بيحاسب الكل، ولا اتعينت محاسب على اخطاء الناس كونك الانسان المثالي؟؟؟؟ 

بعدين حاجة تنتقدوا الدين، وحاجة بقا يا “مسلمين” تقولوا انكم مقتنعين بشي ومو مقتنعين بشي تاني، هاد كتاب منزل ومقدس، مالو شي قصة ولا كتاب، ومالو شي مفصّل على أد فلان ورغباته. بديننا في شي حلال وفي شي حرام، هدول ما فيهن نقاش، ممكن ناقشك بالمشتبهات بس برجع بقول كل واحد قلبو دليلو، وكل واحد رح يتحاسب عن حالو، والحساب عند ربنا مو عند فلان او علتان. بدك تعمل حرام، اسطفل، نحنا علينا ننصحك، بس بالاخر انت اللي رح تتحاسب، ومشان هيك مو ضروري تدل غيرك عالحرام، لانك رح تتحاسب الضعف. هي قوانين الدين وانت تابع لهالدين والمفروض تلتزم، متل ما بتلتزم بقوانين شركتك، ومتل ما حضرتك بتلتزمي بلباس الشركة الفلانية للطيران شو ما كان شكلو او لونو لأنو هاد عملك

 انا بس بدي شغلك وحدة، انو حاج بقا تنتقدوا، لأنو هدول الناس اللي بس عايشة لتنتقد ما حدا بالعالم بيحبها او بيحب يكون قريب منها، مالو شي مريح بنوب. وطالما مو مأثرين عليك وعلى حريتك الشخصية ضمن اطار معين، ما دخلك.. ايه نعم، ما دخلك!! لو فعلا خايف على فلان من الناس، فيك تنصحه وبأسلوب متل العالم، بس سبحان الله، في ناس بتنتقد لمجرد الانتقاد، سآلة يعني!